Ibitaro bya Ruli byizihije Umunsi Mpuzamahanga w’Abarwayi, ufite insanganyamatsiko igira iti: “Impuhwe z’Umusamariya: Gukunda wakira ububabare bw’undi.” Uyu munsi wari umwanya mwiza wo kuzirikana no gushimangira indangaciro z’impuhwe, urukundo n’ubwitange mu kwita ku barwayi.

Muri ibyo birori, hatanzwe impano ku barwayi mu rwego rwo kubereka ko batari bonyine no kubahumuriza mu bihe barimo. Hanabayeho umwanya wo gusabana no gusangira nabo, bigamije kubongerera ibyishimo no kubereka urukundo n’ubwitange.

Iki gikorwa cyayobowe n’Uhagarariye Arikidiyosezi ya Kigali, Padiri Donatien Twizeyumuremyi, ari kumwe n’Umuyobozi Mukuru w’Ibitaro bya Ruli, Dr Kaneza Deogratias, ndetse n’Umunyamabanga Nshingwabikorwa w’Umurenge wa Ruli wahagarariye Akarere ka Gakenke. 

Mu butumwa bwatanzwe, hibanzwe ku gukomeza kwimakaza umutima w’impuhwe no kwita ku murwayi mu buryo bwuzuye, hatitawe gusa ku kuvura umubiri ahubwo no kumuba hafi mu buryo bw’umutima.

Ibitaro bya Ruli byongeye kugaragaza ko serivisi bitanga zishingiye ku bumuntu n’urukundo, bigamije ko buri murwayi yakira ubuvuzi mu mwuka w’impuhwe, icyubahiro n’ubwitange.