Ibitaro bya Ruli, ibigo nderabuzima bibishamikiyeho ndetse n’Ishuri Rikuru ry’Ubuzima rya Ruli bibutse ku nshuro ya 31 Jenoside yakorewe Abatutsi mu 1994, by’umwihariko abari abakozi n’abarwayi biciwe mu bigo by’ubuvuzi.

Iki gikorwa cyatangijwe n’urugendo rwo kwibuka, rwatangiriye ku Bitaro bya Ruli rusorezwa ku rwibutso rwa Jenoside yakorewe Abatutsi 1994 rwa Ruli, aharuhukiye imibiri y’inzirakarengane ziciwe ahari ibiro bya segiteri ya Ruli. Nyuma yo gushyira indabo ku rwibutso, abitabiriye bakomereje umuhango muri salle y’Ishuri Rikuru ry’Ubuzima.

Aha hatangiwe ubuhamya bw’abarokotse Jenoside, hanatanzwe ikiganiro cyibanze ku mateka y’itegurwa n’ishyirwa mu bikorwa rya Jenoside yakorewe Abatutsi mu 1994. Hanacanwe urumuri rw’icyizere, nk’ikimenyetso cy’ubuzima bushya no gukomeza urugendo rwo kubaka ubumwe n’ubwiyunge.

Umushyitsi mukuru, Visi Meya ushinzwe imibereho myiza y’abaturage mu Karere ka Gakenke, Madame Uwamahoro Thérèse, yashimangiye ko urubyiruko ari urufunguzo rw’amahoro arambye. Yibukije abakozi b'Ibigo by’Ubuvuzi n’ishuri Rikuru ry’Ubuzima gukomeza guhangana n’ingengabitekerezo ya Jenoside no kuyirandura burundu.