Uyu munsi, tariki ya 3 Ugushyingo 2025, Ibitaro bya Ruli byizihije Umunsi Mukuru wa Mutagatifu Maritini wa Porres, umurinzi w’ibitaro. Ni umunsi wizihijwe mu byishimo no mu mwuka wo gushimira no kuzirikana indangagaciro ziranga uyu mutagatifu wamenyekanye ku kwicisha bugufi, urukundo n’ukwitangira abakene n’abarwayi.

Ibirori byatangijwe n’ikiganiro cyatanzwe na Abbé Reverien Nshimiyimana, Padiri Mukuru wa Paruwasi ya Ruli, afatanyije na Dr Kaneza Deogratias, Umuyobozi Mukuru w’Ibitaro bya Ruli. 

Mu kiganiro cyabo, bagarutse ku buzima bwa Mutagatifu Maritini wa Porres, bashimangira uko yabereye icyitegererezo abakorera mu rwego rw’ubuzima, cyane cyane mu kwita ku bababaye no kubaha serivisi zirimo impuhwe n’urukundo.

Abbé Reverien yibukije abakozi b’ibitaro ko gukorera abarwayi atari akazi gasanzwe gusa, ahubwo ari ubutumwa bwo kugaragaza urukundo n’imbabazi. Yashishikarije buri wese gukomeza kurangwa n’umutima wo kwitanga no kwakira neza ababagana.

Ku ruhande rwe, Dr Kaneza Deogratias yashimiye abakozi ku murava n’ubwitange bagaragaza mu kazi ka buri munsi, abasaba gukomeza kwimakaza indangagaciro za gikirisitu zirimo ubupfura, ubunyangamugayo no gukorera hamwe, bityo Ibitaro bya Ruli bikomeze kuba icyitegererezo mu gutanga serivisi nziza z’ubuzima.

Uyu munsi wasize abakozi n’abitabiriye ibirori bongereye imbaraga mu murimo wabo, biyemeza gukomeza gukorera abarwayi mu mwuka w’urukundo no kwicisha bugufi, bakurikiza urugero rwa Mutagatifu Maritini wa Porres.