Ibitaro bya Ruli, mu rwego rwo gusoza ukwezi kwa Gashyantare no gukomeza guteza imbere isuku n’imikorere inoze, abakozi b’Ibitaro bya Ruli bibumbiye mu matsinda atandukanye bakoze umuganda rusange wibanze ku bikorwa by’isuku no kunoza imikorere ya buri munsi.

Uyu muganda, wabaye kuri uyu wa Gatanu tariki ya 28 Gashyantare 2025, wibanze ku isuku mu bice bitangirwamo serivisi z’ubuzima, gusukura ubusitani buri ku nkengero z’ibitaro, no gushyira ku murongo inyandiko zifashishwa mu gutanga serivisi z’ubuvuzi.

Nka gahunda y' igihugu, mu bitaro bya Ruli naho umuganda ni igikorwa ngarukakwezi kigamije guteza imbere umuco wo kugira uruhare mu iterambere ry’ibitaro no gutuma abagana serivisi zitangwa babibona mu mwimerere mwiza.

Abakozi bitabiriye umuganda bagaragaraga mu byishimo n’ubwitange, ndetse basabye ko ibikorwa nk’ibi byajya binahuza n’abaturage mu rwego rwo kubaka ubufatanye hagati y’ibitaro n’ababagana.

Ibitaro bya Ruli bikomeje gushyira imbere ibikorwa bituma serivisi zihatangirwa zirushaho kuba inoze, harimo n’isuku ihoraho, imitangire ya serivisi zinoze, ndetse no gukoresha neza ikoranabuhanga mu micungire y’inyandiko.